राई नेतृत्वको जनजाति पार्टीको घोषणा आज

एमाले र काँग्रेस परित्याग गरेका जनजाति नेताहरूले बिहीबार अशोक राईको अध्यक्षतामा ‘संघीय समाजवादी पार्टी’को घोषणा हुँदैछ । विहीवार नेपाः बैङ्कवेट नयाँ बजारमा दिउँसो १२ बजे पत्रकार सम्मेलन गरी नयाँ पार्टीको नेतृत्व, विधान र झण्डा सार्वजननिक गर्न लागिएको नेता राजेन्द्र श्रेष्ठले जानकारी दिनुभयो ।

एमाले काँग्रेस लगायतका पार्टी परित्याग गरेका नेताहरुसँग वार्ता जारी नै रहेकाले थप पदाधिकारीहरुको टुंगो लाग्न बाँकी रहेको श्रेष्ठले वताउनुभयो । पार्टी घोषणा कार्यक्रममा काँग्रेस परित्याग गरेका जनजाती नेताहरु समेत सहभागी हुने वताइएको छ । पूर्व कांग्रेसी नेतालाई पार्टीमा दोस्रो पद दिने तयारी भएको वताइएको छ ।

एमाले परित्याग गरेका नेताहरुको बाहुल्यता रहने नयाँ पार्टीमा पूर्व कांग्रेस र नेकपा एकीकृतका पनि नेताहरु सहभागी हुने बताइएको छ । नेता श्रेष्ठका अनुसार पूर्व सांसद दूर्गामणि देवानको नेतृत्वमा २५ भन्दा बढी नेता आउने पक्का भएको छ भने नेकपा एकीकृतबाट राधा तिमल्सिनासहितका नेताहरु सहभागी हुनेछन् ।सैद्धान्तिक विवादका कारण चैतन्य सुब्बा नेतृत्वको जनजाति अगुवा र कुमार राईसहितका कांग्रेस त्यागेका नेताहरु भने सहभागी नहुने भएका छन् ।