नौ बर्षका बालकको तौल ८० किलो !

१६ कात्तिक, विराटनगर । नौ बर्षका बालकको सरदर तौल कति हुन्छ ? सामान्यतया अनुमान गर्न सकिन्छ २५ देखि ४० किलोसम्म ।

मोरङको जाँते गाविस वडा नम्बर ४ का नौ बर्षका गणेश तामाङको तौल भने ८० किलोग्राम रहेको छ । उमेरको अनुपातमा शारीरिक तौल बढी भएकै कारण उनलाई हिड्नदेखि लिएर अन्य काम गर्न समस्या हुने गरेको छ । ‘मुस्किलले २० मिनेटको दूरीमा रहेको विद्यालय पुग्न उनलाई ४० मिनेट लाग्छ’ गणेश भन्छन् ।

गणेश जाँते ४ खोलिटारस्थित सिंहदेवी निमाविको कक्षा ३ मा अध्ययनरत रहेको अन्नपूर्ण पोष्ट दैनिकले खबर छापेको छ । ‘हिड्न नसक्दा विद्यालय जानै मन लाग्दैन,’ उनी भन्छन् । दिदि सरस्वतीका अनुसार पहिले एक बर्षअघिसम्म गणेशको तौल एक सय किलोग्राम थियो । ‘खानपान पनि गणेशको सामान्य छ,’ उनी भन्छिन, ‘घरका सानातिना काममा सघाउन भाई तम्सन्छ तर उसको शरीरले साथ दिन्न ।’

भद्दा शरीर र नाम पनि गणेश भएकोले धेरैजसो साथीले हात्ती भनेर जिस्काउने गरेका छन् । गणेश मोटो छ, हिँड्दा पनि हल्लिदै हिड्छ, नयाँ मान्छेले देखे भने त एकछिन उभिएर हेर्छन,’ कक्षा ७ मा अध्ययन गर्ने मिलन गौतम भन्छन्, ‘गाउँमा कोही नौलो मानिस आयो कि उसको फोटो खिचिहाल्छ ।’