चीनसंग शून्य भन्सार सुविधासम्बन्धि सम्झौतामा हस्ताक्षर

२७ कात्तिक, काठमाण्डौ । चीन र नेपालवीच नेपाललाई दिने शून्य भन्सार सुविधासम्बन्धि द्विपक्षीय सम्झौतामा हस्ताक्षर भएको छ । सम्झौता पत्रमा वाणिज्य तथा आपूर्ति मन्त्रालयमा सोमवार एक कार्यक्रमकावीच आपूर्ति मन्त्रालयका सचिव लालमणि जोशी र नेपालका लागि चिनियाँ राजदूत याङ हाउलानले हस्ताक्षर गर्नुभएको छ ।

हस्ताक्षारपछि सचिव जोशीले चीनले नेपाललाई दिएको सुविधाबाट दुई देशबीचको व्यापार घाटा न्यून गर्न सहयोग पुग्ने विश्वास व्यक्त गर्दै चीनलाई नेपालमा लगानी बढाउन आग्रह गर्नुभयो । यसैगरी  नेपालका लागि चिनियाँ राजदूत हाउलानले नेपालबाट चीन निर्यात हुने ९५ प्रतिशत सामग्रीमा शून्य भन्सार दरको सुविधा दिएको उल्लेख गर्दै नेपालको निर्यात वृद्धि हुने विश्वास व्यक्त गर्नुभयो ।

यस व्यवस्थाले २०१३ सम्ममा चीन निकासी हुने वस्तुमध्ये २६६ भन्दा बढी वस्तुहरूले चीनको बजारमा शून्य भन्सारमा प्रवेश पाउने छन् । चीनले विविध वस्तुमा तीन प्रतिशतदेखि ३५ प्रतिशत भन्सार लिँदै आएको थियो ।  सम्झौता पछि नेपाललाई चीननले सात हजार सात सय ८७ वस्तुमा भन्सार छुट उपलब्ध गराउने छ । नेपाललाई चार हजार सातसय २१ वस्तुमा त्यस्तो सुविधा उपलब्ध गराउँदै आएको थियो । चीनले नेपाललगायत अल्पविकसित मुलुकहरूलाई उक्त सुविधाअन्तर्गत ती देशका उत्पादनलाई शून्य भन्सार सुविधा दिँदै आएको छ ।